إليكم هذه القصيدتين وهي بين الشاعرين الكبيرين


عبدالله بن زويبن الحربي

والشاعر عبدالله بن عون العتيبي


يقول بن زويبن







مشينا من العارض على صافي الماطـور=نهـار السفـر مـن لايدنّيـه مادنّـا
عسى الله يعديه العواكيـس والعاثـور=بنا يم ابـو سلمـان منعـوب ومعنّـا
عزمنا وحنا من محبـه وطيـب شعـور=عليه الحرير اضعـف سلوكـه يجرنّـا
يسوقه صبيٍ من عتيبـة طويـل شبـور=يطـوف المواتـر كلهـا مايطوفـنّـا
وعلى الباب الأيمن شاعر عتيبه المشهور=ابن عون فـي طاروقـه المنفـرد غنّـا
وانا والشويّب نحسب ان اللحن مكسور=نقول اعدل الطاروق واثر البـلا منّـا
غريـبٍ علينـا لاهجينـي ولا مجـرور=وقعدنا نغرّد خـارج السـرب لاهنـا
على الدبك مثل المستجدين بالطابـور=وتعبنـا وعفنـا واستخرنـا وهـونـا
وقعدنا نعاين فالانبيـرات والديكـور=تقـل فيـه شـيٍ فالغمـاره مهولنـا
لين انا نسفنا نسفـت المـوج للبابـور=بريدة وسكـان المليـدا علـى ايمنـا
ولقينا جسوراً تنطوي في بطون جسـور=وعلى واحداً منهن على الـرس ميلنـا
ولقينا الحويفي واقفٍ عند باب السـور=نطحنا بكلمـة مرحبـا حيـن حولنـا
وقلطنا وهو يقبل ويقفي كما المسعـور=يشعشع وعـدّه بالتراحيـب ياكلنـا
وعلينا عياله يدرجون اشقـرٍ مذعـور=وراه المداخـن كـل لحظـه يمـرنـا
وسمعنا وسولفنـا وجـا للمثايـل دور=وسمعنا طرايف شعرهم واسمعـوا منـا
وقلطنا على السفره عسى خيرهم مكثور=واكلنا من اسمـان المفاطيـح ليـن انـا
سمحنا وعودّنا علـى المجلـس المعمـور=وقعدنا نسولـف ساعتيـن وتسهلنـا
لأهلنا وجينا يوم بيّـن شعـاع النـور=تبيّـن وشفنـا والظـلام انجـلا عنـا
ونبيها زياره دايمه كـل سـت شهـور=يزوروننـا ونزورهـم كـان خلـنـا
الايام لو ماهيب دايـم فـرح وسـرور=تعشّن محمد والصحابـه ماهـو حنـا
يقول الخلاوي بالمثـل قدمنـا بعصـور=نعـد الليـالـي والليـالـي يعـدنـا





وهذا رد عبدالله بن عون












على وسق جيبٍ كنـه الريمـي المذعـور=رفعنـا الهجينـي يـوم فوقـه تـوازنـا
انـا والزميـل منيـف والمنهـي المامـور=دعينـا وأجبنـا لابوسلمـان واذعـنـا
بعد مافهق صلبـوخ بـادرت بالميسـور=نغني بيوتٍ مـن قصيـداً ماهـوب إلنـا
وابو بدر جاوبنا ولا بـان منـه اقصـور=ثلاثـه ورابعـنـا رفــض لايعـاونـا
وابو بدر مثل امقـدي الخـور بالمقهـور=ليـا شافنـا تهنـا الطريـقـه تماكـنـا
ويقول انت قدامي وانـا دوب بالناظـور=اشوفه وهو قدمـي علـى مثـل ماكنـا
لاشك الرها ماحـط للشـك عنـده دور=عقيـداً لحالـه ماغـزا معـك يامهـنـا
هو الشاعر الكابر وانا الشاعـر المكبـور=وكلام الصراحه مـن كمالـت مراجلنـا
لو الشعر له لجنـة عدالـه ولـه دستـور=لابوبـدر جـزلات الجـوايـز تعـدنـا
لاشك انحمد ربي على وضعنـا المستـور=لجـان القصايـد مثـل لجنـة مزايـنـا
ارا شعر بعض النـاس رشٍ بـدون انـذور=الـى مـره العاصـوف شالـه ولا ثنـا
على جرته تلقا وساع الفجـوج ادهـور=الـى جـا الفيـاض الضاميـه ماسقاهنـا
كلامٍ رخيصٍ لـو يصفـق لـه الجمهـور=ولـو شجعـه مـاراح منـا ولا مـنـا
يحور ويـدور بفكرتـه مايجـي المحضـور=عـن المنهـج المعتـاد ماهـون ومثـنـا
نجامل ولا نشره على العمي هـن والعـور=جالى مارضى اللي قبلنـا كيـف يرضنـا
ومزار الحويفي نعتلي به خشـوم القـور=وعلـى ضلـع ابـان ومـا تبيـن تبينـا
هشاشٍ بشـاشٍ كـل ماحصّلـه مدمـور=ودماره علـى الخرفـان والهيـل والبنـا
عسى اللي سواته من صدوف الدهر ماجور=ويـمـد بحيـاتـه ويحمـانـا ويـمـنـا
يابو بدر ماعني وعـن صاحبـي مذخـور=تعجرف علينـا وانـت بالطيـب ضامنـا
انا والشويب كلنا فـي رضـاك حضـور=نجاملـك وانتـه ياجـب انـك تجاملنـا
نقدرك ونراعيك وانـرد لـك بالشـور=ومدامك علـى هالحـال لاعـاد تامنـا

بارك الله فيك


على إمتاعنا بقصائد


عمالقة الشعر النبطي

شعر جزل يستحق القراءه والحفظ