ياللي لعذبات المثايل مشافيق=وين المنصة وابعدوا عن طريقي
ماينفع الجمهور من دون تصفيق=مانتم طيورٍ تحترون العليقي
عيونكم مثل الحراب المذاليق=وإليا طرالي نقدكم جف ريقي
أخترت طاروقٍ من احلا الطواريق=يشعا مشاعر كل قلبٍ رقيقي
يطرب مشاعر كل شاعر وذويق=وإلا عديم الذوق حوضٍ خريقي
احلا من اللي في خلاياه ماذيق=آخر نتاج اللي غذاهن رحيقي
من كل زملوقٍ زهوره مفاتيق=نافه وعرقه داخل الماء غريقي
تبني نواويره بروس الزماليق=أدوار وسط فياض سدرٍ وريقي
شهرت به مع مطلفات المسابيق=اللي لها يم النجوم تحليقي
مع دربهن تفتر متون الحميميق=يمسي على مصباحهن له وغيقي
وازيد به غيرت وضيع المناطيق=لو أن ناره ماتفوَح بريقي
يلحق مشاهيب الجفا والتفاريق=وش في غراب البين غير النعيقي
اليوم توه قر رمي التفافيق=اوحيت لي علمٍ يسر الصديقي
قدام وقته راج بين المخاليق=من مصدرٍ في بث الأنباء وثيقي
وضحٍ لأبو فواز مثل الغرانيق=متفرداتٍ بالبياض اللهيقي
من الدلال البيض فيهن تراميق=بوجار شغمومٍ حجاجه طليقي
إليا غمسها اللي يرب المصانيق=راع الحجير اللي خلاف الفريقي
والا الخيام مسكرات الأراويق=في جانب البيت الشريف العتيقي
مبنيِتٍ لملفلفين الخماليق=أليا لفوا من كل فجٍ عميقي
مطوقة من كل الأطراف تطويق=من خوف لايشتب فيها حريقي
والا النصوب أليا أرهشت وأرخت الضيق=بيض القنوف مروعات الطريقي
إن كان ماحوله كهوفٍ مدانيق=وإلا مداويحن ذراهن رتيقي
من الدويَة جت تموح الرقاريق=تقلنها كسبٍ وراها لحيقي
بين الصلاب وبين حمر الصعافيق=تدحم بعضها مثل سيل المضيقي
فيهن يصوك الكنق كنه ولد هيق=بالعنق والا للزرافة شقيقي
ماشيف مثله بالجزيرة ولاسيق=مجمعٍ كل الجمال الحقيقي
هن نخبة النخبة ومن دون تبريق=بضاعةٍ معها البضايع خشيقي
عطوك حقك حافظين المواثيق=أهل الحظوظ اللي نظرهم دقيقي
في فوزك الساحق سحقت العماليق=راحم بدون عظام هبرٍ وذيقي
نسفتهم نسف اللغم للشواهيق=وطحنتهم طحن الرحى للدقيقي
نطقتهم من ساحة العرض تنطيق=خلولك الساحة وراحم طقيقي
والفوز يبغاله دراية وتنسيق=كلٍ ومجهوده حسب مايطيقي
مافيه مسعىً ينجح إلا بتوفيق=اللي على خلقه عيونه تويقي
للشعر زادتني مواقفك تشويق=وش عاد شعري كان ما امدح رفيقي
لو أنت مانته من مديحي على الريقي=قد قلت قولٍ في مقامك يليقي
قصيدةٍ ماهي هياط وخثاريق=تخلي المعجب بشعره يفيقي
ياللي ليا جت ساعة العسر والضيق=تحط روحك دون ربعك دريقي
إليا بركت تشيل سنجار وطويق=والنير تشتاله عليهن وسيقي
والمدح مايرهم إليا صار تلصيق=والا أنت لك بالطيبب جذعٍ عريقي

،،
صح السانك والسان الشاعر
أبو سلطان :: الله يعطيـكـ الصحة والعافية
والشاعر عبدالله بن زويبن علم من أعلام الشعر
في الخليج العربي
وفخر من مفاخر حــرب
تحيــتي لــكــ

الله الله صح السانك يابن زويبن وصح السانك وتسلم يمينك يابو سلطان مبدع ولك وحشه ياالغالي

ابن زويبن شاعر وعلم من اعلام الشعر

صح لسانه وعلا شانه

ولاهنت اخوي على الانتقاء الرائع

الف شكر لك

نطقتـهـم مـــن سـاحــة الـعــرض تنـطـيـق خـلــولــك الـســاحــة وراحـــــم طـقـيـقــي


شاعر علم ,

أبوسلطان إنتقاء مميز كعادتك


مودتي ..