أنطلق يا اللي تحـب الإنطلاقـه=البرا مـردود والطرقـه قصيـره
لو لحمك جلال واعظامك دقاقـه=ألحق الأولى وتلحقـك الأخيـره
ومثلك اليا حط رجله شال ساقـه=وقام يصلب عظم ساقه في مسيره
أصفر العرقوب لعلومـه لحاقـه=ليه نكسر خاطر الساق الكسيـره
سقت له خيري وخيره وين ساقه=كثرّ الله بيننا .. خيـري وخيـره
يا صديقي عاد .. لاعادت صداقه=ما نحبّ من الوجيه ألاّ السفيـره
ميّزك ربي عن وجيـه الرفاقـه=وجهك مربّع وعينك مستديـره
لا تراودني علـى قطـع العلاقـه=ثايرن دميّ وسيفي فـي جفيـره
كل ما مريّت لـك مبـراك ناقـه=تنشد الجمّال عن مبـرك بعيـره
من يشيل الحمل ويشيل الوساقه=صرّ عينك وأرخ سمعك مع هديره
استحي من تالي أسمك فالبطاقـه=وأنقل الشرهه على شيخ العشيره
الله أنّه لا يعوقـك وأنـت عاقـه=خلقه مفتّح بصر وأعمى بصيـره
ما تسولف غير من باب الحماقه=هكذا الأحمق يعبرّ عـن ضميـره
طال راسك وأبشر بموس الحلاقه=من نوينا نقلعـه مـا نستشيـره
أنت واللي قادهـا قطّـاع ساقـه=شلة ٍ ترقص على نفس الوتيـره
مير باقي من ذبال الـورد باقـه=اأعرضوها في تلفزون الجزيره


الشاعر الكبير والمبدع دائما سداح العتيبي

الأخ القدير رشيد الهديرس دائما ما تمتعنا بما تنتقيه ذائقتك الرآقيه
شكرا لك
ولا تحرمنا جديدك الأجمل
إحترامي وتقديري

والله قصيده ماشاء الله تلامس واقعا حاضرا بقوّه هذه الايام لكثرة الاقزام الطامحين للاسف - مشكوريابو ياسر

طال راسك وأبشر بموس الحلاقه =من نوينا نقلعـه مـا نستشيـره
أنت واللي قادهـا قطّـاع ساقـه=شلة ٍ ترقص على نفس الوتيـره
مير باقي من ذبال الـورد باقـه=اأعرضوها في تلفزون الجزيـره

صح كلك ابو ياسر انتقاء مميز لاعدمناك